|
Xa temos integrada a pasarela de pagos [?] na nosa tenda. Agora precisamos
contratar o servicio de loxística para que os nosos productos cheguen en
perfectas condicións ó cliente. Almacenaxe, transporte e atención ó cliente
conforman a estructura básica deste proceso, se ben a natureza de cada
producto modifica as necesidades loxísticas de cada tenda virtual.
A distribución ou loxística é unha das facetas que máis coidaremos para que o cliente quede satisfeito co noso servicio de comercio-e.
A loxística debe ser capaz de ter un tempo de resposta mínimo para as recollidas, entregas e devolucións, e coas garantías precisas. Nun medio como Internet, onde a competitividade se rixe polo mellor precio e servicio ofertado, as marxes de beneficio estréitanse e os servicios loxísticos tamén teñen que aforrar os custos. Ás veces, o prezo do servicio de loxística é superior ó do producto. A tendencia das empresas loxísticas máis competitivas é a de ofrecer servicios de e-fulfillment ou “loxística integral” especializada no sector do comercio-e, que abarcan a almacenaxe, manipulación, expedición, facturación, xestión de cobros e atención ó cliente.
ELECCIÓN DA EMPRESA LOXÍSTICA
A loxística é unha función que se adoita a subcontratar a outra empresa especializada.
Primeiramente, averiguaremos se o noso servicio habitual de mensaxería ten un servicio especializado para comercio-e, e logo compararemos precios con outras empresas de loxística. As tarifas varían segundo o producto que vendamos, por exemplo, encarece se é perecedeiro e/ou precisa que non se rache a cadea de frío (conxelados, alimentos frescos...). En productos con alto custo de entrega, adóitanse ofrecer diferentes alternativas (entrega rápida, por avión, correo ou barco), indicando o prazo previsto para a entrega. Algunhas empresas que fan comercio electrónico, empregan un provedor distinto para cada tipo de envío (nacional, internacional, Canarias, etc.)
ETAPAS
Non hai un esquema único de distribución loxística no comercio-e; xa que varía segundo o tipo de tenda e os productos. Pero podemos resumilo en tres etapas básicas:
1. Almacenaxe: A empresa prepara o pedido. É importante unha xestión de stocks correcta, así como o control da embalaxe e a saída dos productos. Tamén é adecuado que o cliente controle os productos dispoñibles dende a web.
2. Transporte: O pedido desprázase fisicamente dende o provedor ata o cliente. É moi útil que a empresa loxística nos permita consultar como se atopa o pedido en todo momento, así como a información en tempo real sobre a entrega. Deste xeito, saberemos se a cadea loxística funcionou segundo o previsto, e teremos unha marxe de tempo para poñer en marcha accións paliativas se o cliente non está conforme. O cliente agradecerá coñecer vía web, a través dun código proporcionado pola empresa, os movementos do seu pedido e o tempo que tardará en chegar. É o “tracking” de pedido.
3. Atención ó cliente: Tratar as incidencias que se produzan durante o transporte forma parte da loxística. Ofrecer ó cliente un teléfono ou e-mail para reclamar ou informarse é un valor engadido para gañar a súa confianza e fidelizalo. Outro factor esencial é a recollida de devolucións ou “loxística inversa”. Se o cliente devolve a mercador’ia, o operador ofrecerá un servicio de devolución de calidade para recuperar os paquetes entregados e asocialos ó pedido correcto.
|
