|
Iniciativa galega na Rede, cada vez máis, sinónimo de éxito
 |
Juan Maril, Director de Expansión e Novos Proxectos
|
Unitenda.com: a Universidade apúntase ó comercio electrónico
www.unitenda.com
Unitenda, a tenda virtual da Universidade de Santiago de Compostela (USC), adaptou a súa estratexia ás características de Internet e obtivo uns excelentes resultados. Así o amosan os 200.000 euros de facturación acadados no 2002.
A web naceu no 2001 introducindo nun escaparate virtual os productos que xa vendían na tenda física, todos relacionados coa USC. Nos comenzos apenas vendían. Segundo o Director de Expansión e Novos Proxectos de Unixest, Juan Maril, isto debíase, por unha banda, a que o baixo prezo dos productos non compensaba os gastos de envío, e pola outra, ás características dalgúns productos, como as camisetas, “que os clientes prefiren probar antes de mercar”. Outra traba foi o investimento que supoñía unha campaña de difusión, necesaria para promocionar a web. En vista da escasa resposta inicial, reformularon o negocio e, mantendo os productos da tenda física, introduciron outros novos a prezos competitivos (ordenadores, impresoras, etc.), só para membros da USC. Unitenda convertiuse así en intermediario entre provedores e persoal da comunidade compostelana, polo que reciben unha comisión das vendas. A distribución vai a cargo dos provedores. Os productos están estandarizados, non precisan probarse antes de mercar. O futuro da páxina discorre por este camiño, e prevese introducir novos productos, como teléfonos móbiles, e servicios, como unha axencia de viaxes.
 |
Trofeo de La Galaica entregado na final do Masters de tenis de Shangai
|
A proxección internacional de Artesanía La Galaica
www.lagalaica.es
Corrían os anos cincuenta cando José Manuel Escrich fundou a empresa Artesanía La Galaica, especializada na talla, pulido, gravado e transformación do cristal. En 1993, créouse unha web co fin de amosar os productos, unha páxina moi sinxela que serviu de base para a web actual. Hoxe, os axentes comerciais desta empresa móvense nunha intranet [?] e manexan a Rede para amosarlles ós clientes o catálogo completo de productos de La Galaica. Ademais, a web potencia a súa imaxe corporativa e facilita as comunicacións remotas entre a central, os axentes e os clientes, que poden xestionar os pedidos en tempo real. La Galaica compite no mercado europeo: Suíza, Fancia, Bélxica, Alemaña, pero tamén en EE.UU e Canadá. As operacións con mercados exteriores representan máis dun 20% das vendas totais. Os productos máis novidosos son trofeos deportivos e as figuras para eventos con gravacións persoalizadas. Entre os seus clientes, están o xornal “Marca” ou o Masters ATP de tenis.
www.lagalaica.es acadou o segundo premio no "I concurso Internet útil" da Fundación R.
 |
Juan Sánchez, Director Xeral de Bolsamaría
|
Infomercados axuda, informa e instrúe ó pequeno inversor
www.bolsamaria.com
O éxito da web con información económica e bursátil que Juan Sánchez aloxou inicialmente nun servidor gratuito (Geocities), impulsouno a crear en maio de 1999 Bolsamaría.com, un portal [?] galego con información financeira independente e gratuita. Así, en decembro de 2000 constituiuse Bolsamaría S.L., cun capital social de 24.000 euros.
Tras varias remodelacións, a empresa ubícouse en www.infomercados.com. Nela teletraballan oito persoas, é dicir, traballan conectados a Internet dende as súas casas.O proxecto actual, na liña da idea inicial, consiste en axudar ó pequeno inversor a mellorar a eficacia dos seus investimentos. A web conta con recursos informativos de utilidade e servicios para instruír ó cliente. Segundo o seu director xeral, Juan Sánchez, a traxectoria ascendente e sostida da web débese a un bo proceso de fidelización de clientes. Mostra disto é que en xaneiro de 2003 a web tivo unhas 400.000 visitas [?], e un total de 4 millóns de páxinas visitadas. Os obxectivos son "chegar ós 5 millóns a finais do 2003, manterse como a website galega máis visitada e paliar a crise publicitaria co desenvolvemento dos ingresos por acceso a servicios de pago (B2C)".
|
