O Observatorio do Centro de Competencias en Comercio Electrónico publica os primeiros resultados do Informe e-Barómetro 2002 de Usuarios, centrada na presencia de recursos informáticos nos fogares galegos, concretamente os ordenadores e Internet.

PC’S NO FOGAR

O 37,1% dos fogares galegos contan con PC. Pola súa banda, do 62,9% que non o teñen, un 83,8% dos enquisados non pensa adquirilo nos próximos meses. Entre as principais razóns que alegan para non telo, destaca un 60,9% que afirma non ter necesidade del, mentres que un 31% recoñece non saber utilizalo.

INTERNET

É significativa a cifra que indica que o 73% dos galegos sabe o que é Internet, pero só o 17,6% dos fogares galegos conta con conexión á Rede, sendo o medio urbano o que aglutina a maioría das conexións. A tarifa plana é o sistema de conexión máis contratado, cun 57,1% de usuarios. Nese grupo de galegos que non teñen Internet no fogar, un 31,8% non o ten porque non o cree necesario, e un 25,7% carece de conexión polos custos que xera. Para finalizar, no referido á utilización de Internet por parte dos galegos, un 77,4% dos internautas enquisados afirman que entran na Rede para buscar temas de interese persoal e ocio, mentres que o 71,7%, para utilizar o correo electrónico.