8.- Marketing

8.1.- A planificación como mellor arma cara o comercio electrónico

Poñer en marcha con éxito unha iniciativa de comercio electrónico require unha fonda reflexión. Cómpre involucrar a tódalas partes da empresa, axilizando os procesos internos e creando sinerxias que repercutan favorablemente no negocio tradicional e na nova canle de venda. A solución: facelo paso a paso despois de planificar unha estratexia previa.

A posta en marcha dunha iniciativa de comercio electrónico nunha empresa tradicional pouco ten que ver coa crenza de que é suficiente contratar un deseñador e publicar a web en Internet, á espera de que reciba milleiros de visitas. Poñer en marcha un negocio de comercio electrónico sempre supón unha fonda reflexión e a necesidade de adaptar os procesos internos á nova canle de negocio.

Antes de dar o primeiro paso cara un negocio electrónico, cómpre ter preparada unha estratexia de adaptación da e empresa, isto é, un plan que reflexione sobre os puntos fortes e débiles da nosa empresa, así como as posibles solucións. Neste plan estratéxico débense ter en conta cantos departamentos ten a empresa, porque todos terán algo que dicir ó respecto. Facturación, administración, atención ó cliente, loxística... todos se verán involucrados. Gadis, por exemplo, ó crear a súa tenda en Internet tentou aproveitar a estructura física de venda para optimizar custes, implicando a todo o equipo humano da empresa: dirección e departamentos. Neste sentido, unha visión crítica ás posibilidades de negocio da empresa é o primeiro paso cara ó éxito da venda por Internet. Teña en conta:

1. A forma tradicional de facer as transaccións, por se precisan adaptarse á tenda electrónica.

2. Os clientes habituais da empresa e o mercado obxectivo ó que se quere dirixir.

3. O catálogo de productos da empresa. ¿É un producto con éxito en Internet? ¿Vanse poñer todos á venda?

4. O nivel de atención ó cliente necesario e os recursos para a tenda de Internet.

5. A estratexia a seguir para xestionar o crecemento a medida que a web rexistre visitas e vendas.

6. Analizar o impacto de Internet na estratexia da empresa, por exemplo, posibilidade de diminuír ou cambiar os intermediarios no proceso de comercialización.

7. Definir a estratexia que a empresa vai seguir en Internet, a través da:

Mellora das comunicacións da empresa (correo electrónico e intranet).

Desenvolvemento de programas de marketing relacional: identificación de clientes e marketing persoalizado, programas de fidelización, creación de comunidades virtuais.

Creación da tenda virtual: cómpre ter claro os pasos a seguir

Neste proceso de posta en marcha dun negocio electrónico e de adaptación dunha empresa tradicional a Internet cobra grande importancia a figura dun profesional que asuma o labor da asesoramento/consultoría necesaria, guiando á empresa cara a súa nova canle de negocio

8.2- Aspectos a ter en conta

Á hora de preparar o plan de posta en marcha dunha iniciativa de comercio electrónico cómpre:

1. Dispoñer do coñecemento necesario para poñer en marcha a iniciativa de comercio electrónico.

2. Valorar o investimento necesario para crear un proceso de negocio electrónico.

3. Pensar no xeito de mellorar a cadea de valor do seu negocio coa adaptación á nova canle de negocio.

4. Identificar outras iniciativas similares de negocio on line. Analice o seu éxito ou fracaso.

5. Analizar a posición dos seus competidores respecto á esta nova canle de venda. Que fan e como o fan.

6. Determinar a información, productos e servicios a suministrar vía web ós clientes.

7. Pensar como empregar a información dos clientes habituais para facilitar que continúen facendo negocios coa empresa vía web.

8. Identificar xeitos de axudar ós clientes que chegan vía Internet coa plantilla actual de empregados.

9. Identificar novos xeitos de xerar cartos con vendas por Internet ou atraendo a novos clientes dende a web ata a tenda física.

10. Pensar novos xeitos de ofrecer os productos ou reorganizarse para crear novas oportunidades de venda por Internet.

11. Promocionar a nosa web

8.3 O web Marketing

Internet e as novas tecnoloxías non só dan novas posibilidades de negocio ás empresas, tamén abren novos camiños para a relación cos clientes. Neste sentido, o mercado require cada vez máis que a empresa bote man de novas técnicas para achegarse ó cliente. O emprego de Internet e dunha web corporativa supoñen toda unha revolución neste eido. Os departamentos de marketing sábeno, e moitos deles xa empregan estas ferramentas útiles e efectivas para achegarse ó cliente.
Os beneficios de Internet tradúcense en moitos dos ámbitos da actividade empresarial, e o marketing é un no que ten especial incidencia. Sen ir máis lonxe, unha páxina web non é senón unha poderosa ferramenta de promoción de marca. Pero isto é soamente o comenzo. Existe un enorme abano de posibilidades para que unha empresa se promocione e acade un maior achegamento ó cliente empregando Internet e unha web corporativa. Os departamentos de marketing das grandes empresas sábeno, e moitos deles xa integran o "web marketing" (ou "marketing on line") como un novo recurso para chegar ó mercado.

As ferramentas do "web marketing" son numerosas: dende a web corporativa ós programas de afiliación, pasando polo correo electrónico e a publicidade on line existen ferramentas de grande utilidade que, ben empregadas, poden dar novas solucións de marketing para unha empresa.

VANTAXES

- Empregar estas ferramentas de marketing reporta unha serie de beneficios a unha PEME:

- Reducción de custos: o contacto co cliente é máis barato que no caso dunha campaña tradicional de publicidade. Ademais, unha páxina web pode dar unha información máis completa ó cliente que a visita.

- Ampliación do mercado: non existen fronteiras para unha web, agás aquelas que marca a linguaxe. Unha web e unha campaña de "web marketing"poden expandir a cobertura xeográfica e de vendas dunha PEME e abrir mercados que doutro xeito sería imposible. Ademais, permite ampliar a imaxe de marca en lugares onde non fai publicidade ou non ten presencia física unha empresa.

- Nova canle de comunicación co cliente: o "web marketing" mellora o fluxo de visitas a súa web, onde cabe a posibilidade de ampliar información (productos, ofertas, etc.).

- Maior coñecemento do mercado: identificar ós clientes e coñecer os seus gustos e demandas permite logo acurtar a estratexia da empresa.

- Individualización e persoalización: Os impactos persoalizados teñen unha maior efectividade na mensaxe. Isto pode conseguirse gracias ó coñecemento do cliente que podemos obter cunha páxina web.

- Interacción co cliente: unha páxina web ou unha campaña de marketing a través de Internet debe permitir a resposta do cliente. Será a mellor forma de recoller de xeito directo o froito do esforzo de promoción dunha empresa.

- Fidelización do cliente: a través de programas de afiliación e recomendacións, pódese conseguir que o cliente se convirta nun mercador habitual na nosa empresa.

8.4.- Novas ferramentas de marketing

1. Web corporativa: Unha web corporativa, se está ben deseñada, é unha ventá aberta á empresa e sirve como punto de partida para desenvolver proxectos máis complexos (como, por exemplo, comercio electrónico). Para ser efectiva e realizar a súa funcion de promoción de marca, debe estar sempre actualizada e dar resposta ás demandas que cheguen.

2. O correo electrónico e o e-mailing: Enviar mensaxes de correo electrónico persoalizados ó seu cliente pode ter unha grande efectividade, sempre que non se caia no spam (correo non solicitado). As accións de e-mailing poden adecuarse ó cliente e anunciar, por exemplo, ofertas, promocións...

3. Boletíns de novas (newsletters): Son publicacións dixitais que se envían por e-mail e que poden incluir texto, imaxes, gráficos ou enlaces. Habitualmente empréganse para ofrecer información de calidade ó cliente ou subscritor.

4. Intercambio de links: Trátase duha práctica habitual entre empresas que queren promocionar a súa páxina web. Unha colocación estratéxica de enlaces pode multiplicar as visitas a unha web e a popularidade dunha empresa na Rede.

5. Publicidade on line: A publicidade on line pode chegar a ser moi efectiva e axustarse perfectamente ó perfil do cliente. O banner é a forma máis común de publicidade on line.

6. Programas de fidelidade: existen como ferramenta de marketing os programas de afiliación e fidelidade. Trátase de programas que ofrecen descontos ou vantaxes a novos clientes ou ós compradores máis habituais.

7. Base de datos de clientes: unha web pode ser unha arma moi efectiva para recoller datos de posibles clientes e completar unha base de datos de gran utilidade para calquera empresa.

8.5- A web corporativa

O éxito dunha web de empresa radica, entre outros factores, na súa imaxe, pero sobre todo no seu contido. Debemos ter claro que clase de persoas accederán, e a quen lle poderá interesar o noso producto, servicio ou contidos. Debemos conseguir que o navegante se sinta cómodo, que haxa un equilibrio entre imaxes e texto, e non abusar dos elementos gráficos, para axilizar a velocidade de carga. Non se trata de amosar o mellor deseño, senón de que ese deseño, ademais de atractivo, sexa útil.

Debido a isto, os sitios web corporativos convértense no principal medio de comunicación das empresas. Frecuentemente, o obxectivo comunicativo queda diminuído polo excesivo énfase no obxectivo informativo. Volcar toda a información corporativa nunha web non significa comunicar. Seleccionar e segmentar a información que queremos facilitar en función do perfil do interlocutor: público interno, clientes, distribuidores e comerciais, e presentala en coherencia coa imaxe da empresa si é unha actividade de comunicación.

FERRAMENTA ESTRATÉXICA

A identidade corporativa xa non é vista pola empresa como un luxo caro, senón como unha ferramenta estratéxica, como amosa a crecente implantación por parte das empresas de programas de identidade corporativa tras unha coidada elaboración de marca e de estudios de mercado, polo que dentro desta identidade corporativa, a web empresarial ten unha importancia moi grande.

Así mesmo, a web corporativa sempre pode ser o primeiro paso cara o obxectivo final da realización de transaccións vía comercio electrónico, e aínda que crear un espacio web corporativo non é unha inversión importante en termos económicos, pode ser a forma de competir coas empresas máis desenvolvidas e poderosas, ou de ofrecer exclusividade ós seus clientes, provedores ou outros axentes que interactúan coa empresa.

Algunhas razóns para facer unha boa web

Algunhas das razóns polas que é necesario esforzarse na elaboración da web da nosa empresa son:

Mellorar o servicio ós clientes actuais, xa que poden poñerse en contacto coa empresa, consultar as características dun producto, realizar transaccións comerciais, etc.

Ofrecer unha imaxe empresarial innovadora, aínda que co tempo será habitual que tódalas PEMEs estean en Internet.

Extender o mercado potencial a todo o mundo.

Reducir os custos de comunicación. A través do correo electrónico, por exemplo, e coa vantaxe adicional de que a información chegue de xeito instantáneo ó buzón do receptor.

Homoxeneizar a información corporativa.

Proporcionar a información que queiramos facer pública ou restrinxida ós clientes e ós empregados (a través dunha intranet)

Obxectivos

Unha organización pode perseguir diferentes obxectivos cando pón en marcha un website corporativo:

Pódese utilizar este novo espacio de comunicación para dar a coñecer información xeral sobre a empresa: descrición das súas actividades e obxectivos, ubicación xeográfica, delegacións, contactos, historia e estructura do grupo empresarial, difusión de noticias, etc.

Presentar o catálogo de productos e/ou servicios; pode ser estático ou estar conectado a un sistema de xestión de stocks,ofrecendo información actualizada sobre a súa dispoñibilidade.

Dar a coñecer oportunidades de emprego na organización: é unha forma de buscar persoal cualificado máis barato e eficaz que os anuncios na prensa. Ademais, pode automatizar a xestión dos CVs cun formulario electrónico e unha base de datos.

Proporcionar novos servicios ós clientes: seguimento dos envíos (por exemplo; www.seur.es), consulta da factura on-line (como www.telefonicaonline.com).

Proporcionar soporte técnico e asesoramento post-venda (FAQs ou preguntas máis frecuentes, actualizacións, manuais, etc.)

Habilitar unha canle aberta ás opinións, consultas e suxerencias dos clientes.

Conseguir a participación do cliente en xogos, charlas, concursos, etc. O fin é desenvolver unha comunidade de usuarios que interactúen e se comuniquen con outros internautas, conseguindo a súa fidelización

Gañar a confianza do cliente

Non dar garantías de seguridade nin información sobre a nosa empresa, erros de navegación na web, esixir demasiados datos persoais ou ofrecer unha soa forma de pago son factores que desmotivan ó consumidor á hora de mercar na nosa tenda virtual. Coidar e actualizar o noso negocio electrónico é esencial para gañar a confianza dos internautas e conseguir o éxito, é dicir, a venda.
A desconfianza é un dos principais factores que frean o desenvolvemento do comercio electrónico. O mal funcionamento da nosa páxina web ou unha petición exhaustiva de datos persoais poden facer que o internauta cancele a compra ou marche a outro sitio web. Sen embargo, un cliente satisfeito pode converterse nunha das nosas mellores armas de marketing, posto que, ademais de volver a mercar, recomendará a nosa tenda ós seus contactos. Xa que logo, facer que o cliente confíe en nós é un obxectivo clave para fidelizalo e animalo a mercar os productos da nosa web.

CONSELLOS BÁSICOS

Rematar coa incertidume dos nosos potenciais clientes pódese conseguir a partir duns consellos básicos:

- A usabilidade da nosa web
Dende a primeira impresión, a nosa web deberá ser sinxela e clara. Se os elementos son simples e non escapan ó entendemento dos usuarios, crerán que controlan a web, e polo tanto, aumentarán a súa confianza. Se hai gráficos, deben ser de boa calidade, claros e concisos. O estilo promocional tampouco axuda a xerar confianza, sen embargo os enlaces a sitios web externos de prestixio contribúen a xerala, posto que amosan que a nosa empresa non ten medo a perder usuarios e que ela mesma confía na súa web.

- Existencia real dunha empresa detrás da web
Incluír unha páxina do tipo "quen somos" con información sobre o equipo, enderezos postais, e-mails con contactos e incluso fotografías axuda a ter unha sensación de pertenza ó mundo real. Para a venda a distancia é obrigatorio facer constar os datos reais da empresa (Lei 7/1996 de 15 de xaneiro, de Ordenación do Comercio Minorista). Se a nosa compañía xa existe no mundo físico, utilizaremos o mesmo nome ou marca para aproveitar a confianza xa xerada.

Así mesmo, incluír a nosa política de contidos, e explicar a razón que nos leva a facer as cousas dun determinado xeito axuda ós usuarios a confiar na organización. Dar información que non tería porqué facerse pública pode axudar tamén.

- Información de venda clara
Os prezos amosaranse con claridade, incluíndo impostos e custos de envío, isto é, a información suficiente como para tomar unha decisión de venda a distancia. Ademais, debe haber vínculos visibles ás páxinas coa política de devolucións. Un usuario quere saber as condicións de devolución do producto antes de mercalo. Tamén debe estar dispoñible o contrato de venda.

- Unha navegación efectiva
Evitaremos erros como conexións quebradas, contidos non actualizados, erros de dispoñibilidade do servidor, erros tipográficos ou ortográficos, etc. Os pequenos detalles perxudican moito a credibilidade dun sitio web.

- Demasiada publicidade (pop-ups e banners) na nosa web saturan ó cliente e pódeno facer desconfiar dos nosos propios contidos, ademais de diminuír a operatividade da web.

- Evitar ou retrasar a obrigatoriedade do rexistro
Segundo un estudio realizado en abril deste ano pola AECE, o 19,6% dos clientes non mercou nunca en Internet por medo a facilitar os seus datos á empresa, máxime se aínda non se decidiu a comprar. Os datos persoais pódense pedir unha vez escollido o producto, explicando sempre as razóns desta necesidade e incluíndo a nota informativa sobre o uso dos datos de carácter persoal, conforme á LOPD.
Polo xeral, un internauta non mercará na súa primeira visita á nosa web, senón despois dunhas cantas visitas O negocio na Rede require tempo e aplicación, e está nas nosas mans coidar a nosa web se queremos "enganchar" ós visitantes eventuais e lograr que se convirtan en compradores habituais.

A fidelización do cliente
Acadar a confianza dos clientes é un paso cara a súa fidelización, é dicir, lograr que volvan a mercar na nosa web. Para isto, velaquí algunhas propostas:

Proporcionar a información básica sobre a empresa e resolver as dúbidas máis frecuentes (FAQ), ó tempo que daremos unha atención persoalizada ó cliente. Ás veces necesitaremos de apoio técnico para resolver as dúbidas.

Inclusión de fórmulas para que os clientes participen e opinen. As enquisas, anuncios, foros, e-mail, etc. axúdannos a aprender dos clientes, ó tempo que facemos unha web dinámica e con capacidade de adaptación ós cambios. En Internet, os cambios son constantes segundo se crean necesidades novas, e interactuar cos clientes pode axudarnos a detectalas.

Seguimento despois da venda. Trataremos de comprobar se o cliente quedou satisfeito coa venda e axudarlle coas dúbidas.

As boas prácticas comerciais de AENOR

AENOR é unha entidade privada e independiente sen ánimo de lucro que traballa no ámbito de actividades de Normalización e Certificación (N+C) co fin de mellorar a calidade das empresas. Recentemente, publicouse o Regulamento Xeral da marca AENOR de Boas prácticas comerciais para o comercio electrónico, no que ten unha importancia especial a confianza do potencial cliente como base para as actividades comerciais a través da Rede.

Dentro deste regulamento xeral, hai sete principios que forman parte do Código de Boas Prácticas do Comercio Electrónico. Estos son: seriedade, transparencia, fidelidade, privacidade, seguridade, orientación ó cliente e á mellora contínua da empresa, que se traducen nunha serie de requisitos de actuación ou prácticas de xestión.

www.aenor.es

8.6.- Promocionar a web: o alta en buscadores

Construír unha web é un esforzo que non pode quedar estancado unha vez que se publica en Internet. Para rendibilizar esta decisión é necesario promocionar a nosa web, e unha das ferramentas mellores para facelo son os buscadores (e directorios). A dos buscadores é a categoría máis empregada de Internet e o punto de referencia para a meirande parte dos internautas. Calcúlase que o 90% dos usuarios da Rede os empregan. Estas páxinas encárganse de encamiñar ós usuarios e levalos directamente ó resultado da súa busca. Por iso, estar presentes neles é necesario para que unha web reciba visitas e, por tanto, cumpra os seus obxectivos. Ainda que non nos imos extender na definición dun buscador, si cómpre sinalar que existe diferencia entre directorios (webs que clasifican as webs por tema, como Yahoo) e os motores de busca (buscan de xeito automático, como Google).

O REXISTRO

Para que un buscador rexistre unha web, cómpre dala de alta e rexistrala na súa base de datos. Para iso, haberá que facilitar unha serie de datos relativos á nosa web (enderezo, nome, descrición...). Isto pode levar bastante tempo, sobre todo tendo en conta que existen milleiros de buscadores. Para solventar isto, hai varias solucións:

- Empregar programas que fan o rexistro de xeito simultáneo en milleiros de buscadores.

- Recorrer a empresas especializadas.

- Facer o rexistro de xeito manual. A primeira opción pode dar problemas, xa que moitos buscadores teñen procedementos para evitar a alta automática. A pesar destes problemas, estes programas tamén axudan a facer a alta noutros moitos buscadores. Recorrer a empresas especializadas ou facer a alta de xeito manual son outras opcións.

Principais buscadores e directorios:

- www.google.com
- www.yahoo.es
- www.alltheweb.com
- www.altavista.com
- www.lycos.es
- www.terra.es
- www.hotbot.com
- www.teoma.com
- www.excite.es
- www.infoseek.com
- buscador.vieiros.com
- www.u-lo.com
- www.biwe.es

ALTA MANUAL

Agora, imos centrarnos na alta manual, que é recomendable para unha serie de buscadores de carácter clave en Internet: Google, Yahoo, Altavista, Terra e Alltheweb. Aínda que existen moitos outros buscadores, estes que mencionamos agora garanten unha ampla repercusión en toda a Rede, e o esforzo de tempo para facer a alta é relativamente baixo.
Neste sentido, o procedemento de rexistro manual nestes buscadores pode ser sinxelo, como no caso de Google ou Altavista (só é necesario incluír o enderezo web e o e-mail), ou algo máis laborioso como no caso de Yahoo (solicita web, e-mail, título, comentario, persoa de contacto, comentarios, ubicación xeográfica e observacións adicionais).

ALGÚNS CONSELLOS

Para acceder á zona de rexistro manual de páxinas web nos buscadores, só hai que empregar un enlace nestas páxinas chamado: "Engadir sitio/web" (ou "Submit site", en inglés) e cumprimentar o formulario correspondente. Cómpre destacar que, aínda que o rexistro é relativamente rápido, logo os buscadores tardan tempo en incluir o enlace á nosa web. Así, Altavista emprega entre 4 e 6 semanas, mentres que Google pode tardar catro ou cinco meses. Ademais, nalgúns casos, como por exemplo o de Google (www.google.com), o feito de cumplimentar e facer o rexistro manual da nosa web, non garante a súa inclusión entre os seus enlaces.

Para aparecer rexistrado e acadar un bo posto nos buscadores, cómpre especificar ó máximo a información sobre a páxina web cando facemos a alta de xeito manual. Isto require definir aspectos como a temática, o idioma, as características, información sobre os producto que ofertamos... Por exemplo, será máis fácil aparecer rexistrado nos buscadores se indicamos que a nosa web se adica á venda de caracois da clase Helix-Aspersa , que se indicamos soamente que vendemos caracois .

Outro tema a ter en conta para promocionar a nosa páxina web é o esforzo de intercambio de enlaces con outras webs. Convén poñer enlaces noutras páxinas de productos relacionados cos nosos que dirixan tráfico de visitas ata nós. Ademais, algúns buscadores (como Google) teñen en conta a cantidade de enlaces á nosa web á hora de clasificala diante ou detrás de outras páxinas similares. Cantos máis enlaces haxa apuntando cara a nosa web, mellor. Entre os consellos básicos para rexistrar unha web cabe suliñar o esforzo continuo que debe facerse para manter a web nos buscadores. Normalmente, os buscadores actualizan periodicamente a súa base de datos de rexistro de páxinas, co que unha labor continuada de mantemento do rexistro evitará que a nosa web baixe postos nos buscadores a medida que pasa o tempo.

PROGRAMAS DE REXISTRO

Cómpre sinalar que existen programas de rexistro que fan a alta de xeito automático en moitos buscadores. Algúns destes programas pódense conseguir gratis por Internet (www.softonic.com ou www.download.com). Xeralmente, estes programas son válidos para facer o rexistro na meirande parte dos buscadores, aínda que non adoitan a ser efectivos cos máis importantes, nos que é mellor recurrir á alta manual. Por último, existen empresas especializadas na alta en buscadores, que ofrecen os seus servicios en Internet. Estas empresas teñen uns prezos que varían de xeito sustancial e, normalmente, garanten o rexistro nalgúns buscadores importantes, pero nunca en Google (www.google.com).

8.7.- Faceta comercial do correo electrónico (e-mail marketing)

Amazon é unha das empresas con máis vendas por comercio electrónico do mundo. Principalmente, adícase á distribución de libros, música e videos por Internet. Entre as súas estratexias para promover as vendas está o emprego do correo electrónico, que informa ós seus clientes das novidades e ofertas dos artigos de interese de forma persoalizada. O e-mail inclúe un enlace á sua web, de xeito que, en poucos pasos, o cliente pode dar resposta ó estímulo e mercar o producto.
O de Amazon é só un exemplo de como unha empresa pode empregar o correo electrónico como unha poderosa ferramenta de marketing, sustituindo ó tradicionais mailings (en papel).

Sobre este aspecto comercial do e-mail, podemos salientar como características:

- O custo da comunicación non depende da distancia: custa o mesmo un envío local que un internacional.
- O custo da comunicación non depende do número de destinatarios, xa que é posible empregar unha única mensaxe con múltiples destinatarios.
- O custo non depende da información enviada, xa que se poden xuntar documentos, datos, imaxes, etc.
- A información envíase en formato dixital, o que facilita o seu posterior procesamento.
- Mellora a capacidade doutros medios, ó permitir interactuar coa mensaxe.
- O e-mail marketing permite segmentar ós clientes en función dos seus gustos, adecuando a mensaxe as súas necesidades.

Por outra banda, o e-mail marketing tamén presenta importantes vantaxes fronte a un mailing tradicional:

- Posibilidade de resposta directa mediante un clic de rato.
- Acádase o obxectivo sen pasar filtros (secretarias, por exemplo).
- Posibilidade de redireccionamento a unha web para ampliar a información.
- Obtención dun maior número de respostas.
- Maior rapidez nas respostas.
- Control dos enderezos erróneos (os correos electrónicos non entregados son devoltos).

Lista de distribucuión e programas de envio:

Para facilitar o envío de e-mailings adóitase a empregar unha lista de distribución de correo, xestionada por un servidor (List Server).
Deste modo, cada mensaxe enviada ó servidor será procesada e reenviada a tódolos enderezos de correo que se suscribiron á lista en cuestión. Outra posibilidade é empregar programas de envío masivo de emails

8.8.- As listas de correo

As listas de correo constitúen unha magnífica ferramenta de marketing para atraer, conseguir, manter e fidelizar clientes a través de Internet. Por iso é importante ofrecer ós visitantes da web algo que lles proporcione valor engadido, é dicir, que poidan acceder a contidos de calidade e información interesante ó subscribirse á lista de correo, como noticias, novidades de productos e servicios, artigos, promocións, estudios, consellos, concursos ou reportaxes. Desta forma iremos creando unha base de datos de persoas coas que nos comunicaremos periodicamente eque, co tempo, poden ir convertíndose tamén en clientes.

Os usuarios subscritos a unha lista de correo deron o seu consentimento para recibirmensaxes e adoitan ter unha afinidade ou interese común, polo que constitúen un público moi apetecible para as empresas que comercializan productos ou servicios relacionados coa temática da lista.
Tamén podemos tratar de coñecelos mellor se á hora de rexistrarse na lista solicitamos, ademais do seu email, algún dato adicional como localidade, país, sexo, estudios, profesión ou ano de nacemento. Así poderemos segmentalos por perfil e ofrecerlles contidos axeitados e información comercial que lles interese. Tamén se pode aproveitar algunha mensaxe á lista para incluír un test ou algunha pregunta que nos permita saber máis sobre as súas preferencias, inquedanzas e necesidades.

As listas de correopoden ser de dous tipos:

- Listas de distribución ou newsletters: só o propietario da lista pode enviar mensaxes ós seus membros. Adoita empregarse para distribuír un boletín ou realizar comunicacións das novidades e promocións da empresa. Na Rede existen casos de usuarios que pagan por subscribirse a unha publicación virtual. Obviamente, os contidos teñen que ser de interese para queos usuarios estean dispostos a pagar por eles.

- Listas ou foros de discusión: onde calquera dos integrantes da lista pode enviar unha mensaxe ó resto dos membros. Adoitan ser unha magnífica ferramenta para debatir temas de interese común e coñecer as inquedanzas dos subscritos.
Ademais, dispoñer na web dunha lista ou foro de discusión pódenos axudar a aumentar o número de persoas rexistradas na nosa base de datos. Recoméndase que estas listas sexan moderadas, co cal garántese que as mensaxes que reciban os eus membros teñan un mínimo de interese, e evitar as mensaxes ofensivas ou o spam, que simplemente perseguen a autopublicidade sen ofrecer nada.

Nestes dous tipos de lista, a empresa pode vender espacios publicitarios dentro do contido das mensaxes enviadas ós usuarios (buscar un patrocinador, inserir un bannerou un anuncio de texto).
Por último, destacar que en cada unha das mensaxes que se envíen á lista debe existir un procedemento que permita ó usuario darse de baixa.