3.1.- PASOS

Paso 1: A petición do cliente

O cliente accede á tenda virtual e selecciona un dos productos do catálogo. Posteriormente incorpórao ó carriño da compra e mércao introducindo os seus datos e escollendo a forma de pago. Finalmente, envía a súa petición.

Paso 2: A pasarela de pagos

Unha vez recibida o solicitude do cliente, a empresa rexistra o pedido e procede ó cobro empregando a pasarela de pagos*. Trátase de comprobar se os datos do pagamento do cliente son correctos

* Pasarela de pagos - Sistema proporcionado por unha entidade financeira a unha tenda virtual para xestionar os seus cobros en liña con tarxetas de crédito e débito. Mediante a pasarela procésanse e autorízanse as transaccións do comerciante. Tamén se lle chama TPV Virtual, xa que ten a mesma función que os terminais punto de venda situados nos establecementos comerciais tradicionais

Paso 3: A conexión coa entidade financeira

Os datos que chegan á pasarela de pagos son contrastados pola entidade financeira da tenda virtual. É o momento previo á validación da operación.

Paso 5: Confirmación do pagamento

Chega a confirmación á tenda virtual (a través da pasarela de pagos) da validez da operación e de que o cobro pola venda se fará con normalidade. A entidade financeira facilita á empresa a información precisa para continuar coa operación.

Paso 6: Solicitude ó almacén

A tenda virtual solicita ó seu almacén que prepare o producto mercado polo cliente. Trátase de preparar a mercadoría para transportala ata o consumidor final.

Paso 7: Recollida da mercadoría no almacén

O operador loxístico (ben un courier ou outro sistema de transporte empregado pola empresa) recolle a mercadoría no almacén e prepara o reparto

Paso 8: Entrega ó consumidor final

O operador loxístico entrega ó consumidor final a mercadoría solicitada. A satisfacción do cliente verase cumprida en boa parte se os prazos de entrega foron respetados.

3.2.- Moreira & Cía: un exemplo de B2C galego.

Empresa: Moreira & Cía.
Facturación anual: 24 millóns de euros.
Proxecto:

1. Intranet para comunicación interna da empresa.
2. Tenda de comercio electrónico e catálogo on line.

URL: www.moreira-cia.com
Investimento inicial no proxecto: 30.050 euros (5 millóns de pesetas).
Formas de pago da tenda on line: Transferencia, contrarrembolso e pago na tenda (previa reserva).
Loxística - distribución: SEUR

A empresa galega de venda de equipamento integral para baños Moreira & Cía é un bo exemplo do aproveitamento de Internet e as novas tecnoloxías para mellorar o seu proceso de negocio e abrir unha nova canle de venda. Cunha inversión inicial de 30.000 euros e a colaboración de Aaccentia Multimedia (provedor), Moreira puxo en marcha unha web que agora aproveita de dous xeitos ben distintos: como ferramenta interna de traballo (intranet e como tenda on line de comercio electrónico (B2C) cara ó consumidor final.

A intranet como ferramenta de aforro de custos e tempo

Moreira & Cía é unha empresa galega con 60 anos de historia adicada á venda de equipamento integral para o cuarto de baño, cerámicas, elementos de fontanería, calefacción e materiais de construcción.

Actualmente emprega a máis de 110 persoas e conta con 8 delegacións en toda Galicia, 10 fontanerías e 6 almacéns. Por iso, cando comenzou a funcionar a súa web, www.moreira-cia.com, pensouse en que, ademais de outras funcións, poidese funcionar como unha ferramenta de xestión interna, isto é, que servise para coordina-lo traballo das distintas delegacións e almacéns da firma. O obxectivo: mellorar a comunicación interna na empresa. Así, naceu a intranet de Moreira, que é unha ferramente para "rendibilizar aínda máis a web da empresa", segundo explica o responsable de marketing, Alejandro Vázquez.

A web de venda o público (B2C): www.moreira-cia.com

Moreira&Cía decidíu abrir unha nova canle de venda cunha tenda de comercio electrónico coa convicción de que Internet reportará "grandes negocios para a empresa". Deste xeito, a web www.moreira-cia.com comenzou a medrar, ata converterse nunha tenda on line de artigos para cuartos de baño (billas, radiadores, cerámica...) orientada ó consumidor final. Un dos primeiros aproveitamentos para o proceso da empresa foi o emprego da web como catálogo. O persoal das 8 tendas coas que conta Moreira&Cía en Galicia aproveita que na web hai introducidas 600 referencias de productos e 1.000 fotografías para lle amosar ó cliente o abano de opcións que ten para mercar na súa empresa. Segundo di Agustín Moreira, "é unha axuda ou complemento para o persoal de venda. Debido á complexidade da venda on line dalgúns productos sanitarios (amplia gama de billas, baños, complementos...), as fichas técnicas da web coas medidas dos productos son un complemento importante para ver alternativas e ampliar a información ó cliente".

FERRAMENTA PROACTIVA

O feito de 'somerxer' ó cliente na páxina web de Moreira fai que, na meirande parte dos casos, volva a visitala, e mesmo complete a súa información a través de Internet despois de facer unha visita á tenda física. "Pretendíamos facer unha ferramenta proactiva. O máis normal é que o cliente se volva conectar connosco e non o perdamos", asegura o director de marketing de Moreira, Alejandro Vázquez.

ESTÍMULO PARA A VENDA

Comparado co desembolso que lle supón a Moreira esta tenda on line, a resposta de clientes está a ser máis que satisfactoria: "Coa web temos unha tenda aberta as 24 horas durante 365 días ó ano. Son numerosas as peticións de orzamentos a través da web. Chégannos dende todos os lugares. As vendas son menos, xa que son productos (os baños) de difícil venda por Internet, aínda que estimulamos o interés do cliente, que logo ven ás nosas tendas á procura do producto que antes puido ver na nosa páxina web", di Vázquez. Esta web foi desenvolvida pola empresa Aaccentia Multimedia, que adoptou unha actitude proactiva con Moreira, amosándolle as posibilidades que a tecnoloxía e Internet lle ofrece a un negocio tradicional.